Najoron'ny Mpikambana mpanorina ny faha 3 jolay 2002, ary misokatra ho an'ny olon-tsotra, ny fikambanana politika Tiako i Madagasikara fehezin'ny Hitsivolana faha 90-001 tamin'ny faha 9 martsa 1990.

Ny foiben'ny toeran'ny antoko dia ao amin'ny MAGRO Ankorondrano Antananarivo.

Ny tanjona kendren'ny Tiako i Madagasikara dia :

• Fahamarinana, Fahamasinana, Fampandrosoana, no teny filamatra.
• Ny fahafahana sy fandriampahalemana ho an'ny olona rehetra araka ny fitsipika sy ny dinan'ny firaisambe Afrikanina sy ny firenena mikambana.
• Ny fiarovana ny fahafahana fototra sy ny zon'olombelona.
• Ny fanajana ny tany tan-dalàna.
• Ny fiarovana ny demokrasia.
• Ny fitondrana tsara tantana.
• Ny hampandroso haingana sy maharitra ary mitovy lanja ny faritra rehetra eto Madagasikara, na eo amin'ny lafiny ara-toekarena, na ara-tsosialy, na ara-kolotsaina, ka hiady sy hanao izay handresena ny fahantrana amin'ny endriny rehetra mba ahazoan'ny tsirairay mivelatra ankalalahana eo amin'ny sehatra misy azy avy.
• Ny hampiray volo ny Malagasy rehetra ka hisian'ny tena firaisam-pirenena anjakan'ny fifankatiavana sy fifanajàna ka tsy anavahana fiaviana na foko, na fikambanana Politika hafa, na antokom-pivavahana, na ny maha lahy sy vavy, na fari-pananana.
• Ny hitahiry sy hanatsara ny tontolo iainana sy ny tanàna ary ny vohitra mba ho ara-pahasalamàna sy maha te honina.
• Ny hikolokolo sy hampisandratra ny olona manontolo : vatana, saina ary fanahy, na ao an-drenivohitra na any ambanivohitra, ary hitahiry sy hitondra avo ny soa tohavina Malagasy manerana ny Nosy.
• Hanohana sy hiara-hiasa amin'ny fomba mavitrika amin'ny olona na fikambanana, na fikambanana politika hafa manana ireo tarigetra ireo.